Агульнавядомы таварны знак Рэспублікі Беларусь

У Рэспубліцы Беларусь агульнавядомым таварным знакам можа быць прызнаны таварны знак, які ў выніку працяглага інтэнсіўнага выкарыстання набыў у Рэспубліцы Беларусь шырокую вядомасць сярод патэнцыйных спажыўцоў адпаведнага тавару.

Агульнавядомы ў Рэспубліцы Беларусь таварны знак з’яўляецца падставай для адмовы іншай асобе ў рэгістрацыі абазначэння ў якасці таварнага знака ці для прызнання несапраўднай рэгістрацыі таварнага знака, тоеснага ці падобнага да ступені змяшэння з гэтым агульнавядомым знакам – у адносінах да любых тавараў і/або паслуг.

Рашэнне аб прызнанні таварнага знака агульнавядомым у Рэспубліцы Беларусь прымаецца Апеляцыйным саветам пры Нацыянальным цэнтры інтэлектуальнай уласнасці(далей — Апеляцыйны савет) па выніках разгляду заявы аб прызнанні адпаведнага таварнага знака агульнавядомым у Рэспубліцы Беларусь.

Пры вызначэнні агульнавядомасці таварнага знака пад увагу бяруцца, у прыватнасці, наступныя фактары:

• ступень вядомасці або прызнання таварнага знака ў адпаведным сектары грамадства ў Рэспубліцы Беларусь;
• працягласць, інтэнсіўнасць і рэгіён выкарыстання таварнага знака на тэрыторыі Рэспублікі Беларусь;
• працягласць, інтэнсіўнасць і рэгіён ажыццяўлення любой дзейнасці па прасоўванні таварнага знака;
• працягласць і колькасць рэгістрацый таварнага знака ў краінах свету і/або колькасць заявак на рэгістрацыю адпаведнага таварнага знака ў замежных дзяржавах у той ступені, у якой гэтыя звесткі адлюстроўваюць выкарыстанне ці прызнанне гэтага знака;
• прызнанне таварнага знака агульнавядомым у замежных дзяржавах, у тым ліку і ў краіне паходжання таварнага знака ці ў краіне ўладальніка таварнага знака;
• каштоўнасць, уласцівая гэтаму таварнаму знаку;
• вынікі апытання спажыўцоў тавараў і/або паслуг па пытанні агульнавядомасці адпаведнага таварнага знака, праведзенага спецыялізаванай незалежнай арганізацыяй;
• любая іншая інфармацыя пра абставіны, на падставе якіх можна зрабіць выснову пра тое, што адпаведны таварны знак з’яўляецца агульнавядомым у Рэспубліцы Беларусь.

Пералік таварных знакаў, прызнаных у Рэспубліцы Беларусь агульнавядомымі, можна паглядзець тут.