Беларусь стала членам Гаагскай сістэмы міжнароднай рэгістрацыі прамысловых узораў

З 19 ліпеня 2021 года Рэспубліка Беларусь стала членам Гаагскай сістэмы міжнароднай рэгістрацыі прамысловых узораў.

Аснову дадзенай сістэмы складае Гаагскае пагадненне пра міжнародную рэгістрацыю прамысловых узораў, якое ў цяперашні час існуе ў выглядзе двух дакументаў − Гаагскага акта ад 28 лістапада 1960 года і Жэнеўскага акта ад 2 лiпеня 1999 года (да якога і далучылася Рэспубліка Беларусь, стаўшы яго 66-м удзельнікам). Кожны з названых дакументаў з'яўляецца самастойным міжнародным дагаворам і дзейнічае толькі для бакоў дамовы, якія ў ім удзельнічаюць. З поўным пералікам удзельнікаў абодвух актаў можна азнаёміцца тут. Разам з Рэспублікай Беларусь Гаагскі саюз налічвае на дадзены момант 75 удзельнікаў і ахоплівае 92 дзяржавы па ўсім свеце.

Цяпер для рэгістрацыі прамысловых узораў ва ўсіх або ў частцы дзяржаў-удзельніц Гаагскай сістэмы (у тым ліку ў сваёй краіне) беларускія заяўнікі могуць падаць усяго адну міжнародную заяўку, якая ўключае да 100 прамысловых узораў у межах аднаго класа МКПУ, на адной мове (англійскай, французскай або іспанскай), выплаціўшы адзіны набор пошлін у адзінай валюце (швейцарскія франкі) на адрас адной арганізацыі − САІУ. Папярэдняй падачы нацыянальнай або рэгіянальнай заявак на рэгістрацыю прамысловага ўзору ў якім-небудзь з удзельнікаў Гаагскага саюза не патрабуецца. Заяўка накіроўваецца непасрэдна ў САІУ праз электронную сістэму падачы eHague або (пасля запаўнення на паперы афіцыйнага бланка САІУ) праз службу Contact Hague ці па пошце (у некаторых дзяржавах, у адрозненне ад Рэспублікі Беларусь, дапускаецца таксама падача міжнароднай заяўкі праз нацыянальнае ведамства). Роўным чынам Беларусь можа быць указана ў заяўках, якія паступілі з іншых удзельнікаў Гаагскай сістэмы.

У выпадку падачы міжнароднай заяўкі непасрэдна ў САІУ датай рэгістрацыі з'яўляецца, як правіла, дата атрымання заяўкі САІУ. Праз шэсць месяцаў пасля даты міжнароднай рэгістрацыі ажыццяўляецца публікацыя ў Бюлетэні міжнародных узораў, калі толькі заяўнік не запытаў неадкладную або, наадварот, адтэрмінаваную публікацыю (у залежнасці ад абранай ім стратэгіі і гатоўнасці выйсці на рынак). Пры гэтым неабходна ўлічваць, што ў дачыненні да некаторых удзельнікаў Гаагскай сістэмы (у тым ліку Беларусі), згодна са зробленай імі агаворкай, адтэрмінаваная публікацыя не можа быць прыменена.

Пасля публікацыі міжнароднай рэгістрацыі ведамства кожнага названага ў заяўцы бакоў дамовы самастойна прымае рашэнне аб прадастаўленні прававой аховы міжнароднаму прамысловаму ўзору ў адпаведнасці са сваім заканадаўствам. Тэрмін для апавяшчэння САІУ пра адмову ў прадастаўленні такой прававой аховы складае 6 (у тым ліку ў Беларусі), у некаторых выпадках 12 месяцаў з даты публікацыі міжнароднай рэгістрацыі. Пасля атрымання паведамлення САІУ пра адмову ўладальнік міжнароднай рэгістрацыі прымае меры па пераадоленні адмовы, звязваючыся непасрэдна з адпаведным ведамствам.

Тэрмін дзеяння аховы ў межах Гаагскай сістэмы складае не менш за 15 гадоў (першапачаткова рэгістрацыя адбываецца на 5 гадоў, і дадзены тэрмін дапускаецца падаўжаць двойчы − кожны раз на 5 гадоў). Заканадаўства асобных бакоў дамовы прадугледжвае больш працяглы тэрмін аховы. У такім выпадку дзеянне міжнароднай рэгістрацыі прадаўжаецца да заканчэння максімальна магчымага ў канкрэтнага боку дамовы тэрміну. З інфармацыяй пра тэрміны прадастаўлення прававой аховы прамысловым узорам ва ўсіх удзельніках Гаагскай сістэмы можна азнаёміцца тут.

Гаагская сістэма спрашчае кіраванне міжнароднай рэгістрацыяй прамысловага ўзору. У прыватнасці, заявы пра ўнясенне змяненняў у міжнародную рэгістрацыю (змяненне дадзеных уладальніка, адмова ад аховы ва ўсіх або некаторых названых баках дамовы і г.д.) накіроўваюцца ў адно ведамства (САІУ), пры гэтым выкарыстоўваецца адзін афіцыйны бланк і выплачваецца адна пошліна. Запоўнены бланк заявы накіроўваецца праз службу Contact Hague. Апрача таго, дапускаецца рэгуляваць колькасць названых бакоў дамовы і пералік падахоўных прамысловых узораў пры прадаўжэнні тэрміну дзеяння рэгістрацыі праз службу Contact Hague.

Больш падрабязную інфармацыю аб працы Гаагскай сістэмы можна знайсці на сайце САІУ.