Барацьба з кантрафактам

Дзейнічаючы ў інтарэсах нашых кліентаў, мы надаём шмат увагі барацьбе з кантрафактнымі таварамі, што з’яўляецца адным з моцных бакоў нашай працы. У гэтым напрамку мы цесна супрацоўнічаем з мытнымі і праваахоўнымі органамі.

Адным з інструментаў, які можа дапамагчы праваўладальніку выяўляць і спыняць ўвоз на тэрыторыю Рэспублікі Беларусь кантрафактнага тавару, з’яўляецца мытны рэестр аб’ектаў інтэлектуальнай уласнасці, які вядзецца Дзяржаўным мытным камітэтам Рэспублікі Беларусь (ДМК).

Сёння асноўнымі карыстальнікамі мытнага рэестра з’яўляюцца замежныя праваўладальнікі. Аднак беларускім арганізацыям таксама не варта забываць пра такі варыянт абароны выключнага права пры адстойванні ўласных інтарэсаў і ў мэтах непарушэння правоў трэціх асоб.

Адсочванне парушэнняў выключнага права магчыма, напрыклад, шляхам прыняцця мер у дачыненні да тавараў, што падпадаюць пад мытныя працэдуры, звязаныя з вывазам. Вываз не з’яўляецца парушэннем выключнага права на таварны знак як такой, але можа ўскосна сведчыць пра наяўнасць вытворчасці кантрафакту на тэрыторыі Беларусі.

Калі беларускі таварны знак вядомы ў свеце, то кантрафакт можа вырабляцца i ў іншых краінах. У прыватнасці, у мытны рэестр уключаны таварныя знакі «БЕЛАЗ» і «BELAZ», праваўладальнік якіх такім чынам змагаецца з патокам кантрафактных кітайскіх запчастак, маркіраваных яго таварнымі знакамі, у Рэспубліку Беларусь. Мытны рэестр, які рэгулярна абнаўляецца, публікуецца на афіцыйным сайце ДМК і даступны для азнаямлення любым зацікаўленым асобам.